Чанд суруду таронаи «Шашмақом»-6

Соқиномаи Ироқи Бухоро (Соқиномаи Ироқ)

Мақоми Бузрук, ҷузъи Наср (овозӣ), шуъбаи 2 (силсилаи бухороӣ), Ироқи Бухоро

Чаман шуд тозарӯ, то фасли гулгашти баҳор омад,
Зи ҳар шохе гуле як сарвқадди гулизор омад.
Чаманзори хаёлаш навбаҳори дигаре дорад,
Дил аз худ рафт чандоне ки гулшан дар канор омад.
Чаманзори хаёлаш навбаҳори дигаре дорад,
Дил аз худ рафт чандоне ки гулшан дар канор омад.
Кушуд ин бӯстонро шоҳиди гул турраи сунбул,
Бидеҳ, соқӣ, қадаҳ тағйири ҳангоми баҳор омад.
Шудам нақши қадам, то пойбӯси он санам гаштам,
Ба роҳаш хоксориҳои ман охир ба кор омад.
Муборак бод наврӯзи тараб боғи табиатро
Гули шодӣ шукуфту меваи ишрат ба бор омад.

МАТНИ ШЕЪР:
Чаман шуд тозарӯ, то фасли гулгашти баҳор омад,
Зи ҳар шохи гуле як сарвқадди гулъизор омад.
Чаманзори хаёлаш навбаҳори дигаре дорад,
Дил аз худ рафт, чандоне ки гулшан дар канор омад.
Кушуд ин бӯстонро шоҳиди гул турраи сунбул,
Бидеҳ, соқӣ, қадаҳ тағйир, ҳангоми баҳор омад.
Шудам нақши қадам, то пойбӯси он санам гаштам,
Ба роҳаш хоксориҳои ман охир ба кор омад.
Муборак бод наврӯзи тараб боғи табиатро,
Гули шодӣ шукуфту меваи ишрат ба бор омад.
Зи гавҳар вақти суфтан ин нидо бар гӯш меояд:
«Дилаш сӯрох он касро, ки ин ҷо эътибор омад».
Ба адл оин бубанд, эй боғбон, имрӯз гулшанро,
Амири вақт, яъне сояи Парвардигор омад.

Ғазали Амир

MP3 — фаро кашед ё бишнавед:

1. Барно Исҳоқова. Соқиномаи Ироқ.mp3

2. Озода Ашурова. Cоқиномаи Ироқи Бухоро.mp3

Соқиномаи Муғулчаи Бузрук

Мақоми Бузрук, ҷузъи Наср (овозӣ), шуъбаи 2, Муғулчаи Бузрук

Муғаннӣ, куҷоӣ, ки вақти гул аст,
Зи булбул чаманҳо пур аз ғулғул аст.
Ҳамон беҳ, ки хунам ба ҷӯш оварӣ,
Даме чангро дар хурӯш оварӣ.
Муғаннӣ, навои тараб соз кун!
Ба қавлу ғазал қисса оғоз кун!
Ки бори ғамам бар замин дӯхт пой,
Ба зарби усулам баровар зи ҷой.
Биё, соқӣ, аз май надорам гузир!
Ба як ҷоми боқӣ маро даст гир!
Ки Ҳофиз чу мастона созад суруд,
Зи чархаш диҳад Зуҳра овози руд.

Шеъри Ҳофиз

Соқиномаи Муғулчаи Наво

Мақоми Наво, ҷузъи Наср (овозӣ), шуъбаи 2, Муғулчаи Наво

Биё, соқӣ, аз май надорам гузир,
Ба як ҷоми боқӣ маро даст гир!
Муғаннӣ, навои тараб соз кун
Ба қавлу ғазал қисса оғоз кун
Биё, соқӣ, аз бодаҳои куҳун
Зи ҷоми паёпай маро маст кун
Ки Ҳофиз чу мастона созад суруд
Зи чархаш диҳад Зуҳра овози руд.

Шеъри Ҳофиз

Соқиномаи Мустазоди Наво

Мақоми Наво, ҷузъи Наср (овозӣ), шуъбаи 2, Мустазоди Наво

Биё, соқӣ, он ҷоми гетифурӯз,
Ки шабро ниҳад ноз бар рӯйи рӯз.
Биё, мутрибо, нақше аз нав бубанд,
Бизан ин наворо ба бонги баланд.
Ки н-ояд ба каф мардро дурри ноб,
Набурда сари худ фурӯ зери об.
В-агар з-он ки гӯйӣ сухан, рост гӯй,
Ба ҷуз ростӣ зевари дил маҷӯй.
Надонад дили ҳеҷ донишваре
Суханро беҳ аз ростӣ зеваре.

Шеъри Абдураҳмони Ҷомӣ

Соқиномаи Савти Калон

Мақоми Дугоҳ, ҷузъи Наср (овозӣ), шуъбаи 2, Савти Калон

Ман хоки пойи ту, эй сарви нозпарвари ман,
Ки ҷуз ҳавои висоли ту нест дар сари ман.
Ба роҳи ишқи ту хокам, тариқи ман ин аст,
Дар ин тариқ набошад касе баробари ман.
Ғами ту дар дили тангам нишасту мунфаилам,
Ки нест лоиқи ӯ кулбаи муҳаққари ман.
Зи ҷилваи суману сарв дил наёсояд,
Куҷост сарви сиҳиқомату суманбари ман?
Ҳазар кунед, рақибон, зи теғи мижгонам,
Ки дардмандаму хун мечакад зи ханҷари ман.
Ҳазар кунед, рақибон, зи теғи мижгонам,
Ки дардмандаму хун мечакад зи ханҷари ман.
Ҳилолӣ, аз майи ишрат маро насибе нест,
Магар ба хуни ҷигар пур кунанд соғари ман.

МАТНИ ШЕЪР:
Ман хоки пойи ту, эй сарви нозпарвари ман,
Ки ҷуз ҳавои висоли ту нест дар сари ман.
Ба роҳи ишқи ту хокам, тариқи ман ин аст,
Дар ин тариқ набошад касе баробари ман.
Ғами ту дар дили тангам нишасту мунфаилам,
Ки нест лоиқи ӯ кулбаи муҳаққари ман.
Зи ҷилваи суману сарв дил наёсояд,
Куҷост сарви сиҳиқомату суманбари ман?
Зи турки масти ман, эй зоҳидон, канора кунед,
Ки нест ҳеҷ мусулмон ҳарифи кофари ман.
Ҳазар кунед, рақибон, зи теғи мижгонам,
Ки дардмандаму хун мечакад зи ханҷари ман.
Итоб карду ҷафо низ мекунад, ҳайҳот,
Ҳанӯз то чӣ кунад толеи ситамгари ман.
Ҳилолӣ, аз майи ишрат маро насибе нест,
Магар ба хуни ҷигар пур кунанд соғари ман.

Ғазали Ҳилолӣ

MP3 — фаро кашед ё бишнавед:

1. Сарафроз Почокалонов. Cоқиномаи Савти Калон.mp3

Соқиномаи Савти Калон (2)

Мақоми Дугоҳ, ҷузъи Наср (овозӣ), шуъбаи 2, Савти Калон

Биё, соқӣ, акнун, ки шуд чун биҳишт,
Зи рӯйи ту ин базми анбарсиришт.
Қадаҳ пур кун аз май, ки май хуш бувад,
Хусусан, ки софеву беғаш бувад.
Бидеҳ, то бухуре бар оташ кунам,
Димоғи хирадро даме хуш кунам.
Муғаннӣ, куҷоӣ, ки лутфе кунӣ,
Даме оташе дар дилам афканӣ.
Бурун ор аз фикри худ як дамам,
Ба ҳам барзанӣ кору бори ғамам.
Муғаннӣ, дафу чангро соз деҳ,
Ба ёрони хушнағма овоз деҳ.
Муғаннӣ, биё удро соз кун,
Навоин навои нав оғоз кун.

Шеъри Ҳофиз

Соқиномаи Савти Наво

Мақоми Наво, ҷузъи Наср (овозӣ), шуъбаи 2, Савти Наво

Муғаннӣ, куҷоӣ, ки вақти гул аст,
Зи булбул чаманҳо пур аз ғулғул аст.
Ҳамон беҳ, ки хунам ба ҷӯш оварӣ,
Даме чангро дар хурӯш оварӣ.
Биё, соқӣ, аз май талаб коми дил,
Ки бе май надорам ман ороми дил.
Биё, соқӣ, он май, ки тезӣ кунад,
Ба боғи дилам мушкбозӣ кунад.
Бидеҳ, то бинӯшем ба ёди касе,
Ки ҳаст аз ғамаш дар дилам хун басе.

Шеъри Ҳофиз

Соқиномаи Савти Сарвиноз

Мақоми Бузрук, ҷузъи Наср (овозӣ), шуъбаи 2, Савти Сарвиноз

Биё, соқиё, барги ишрат бисоз,
Макун дар ба рӯйи ҳарифон фароз.
Агар будӣ аз ҷаҳл ҳар сина соф,
Барафтодӣ аз даҳр расми хилоф.
Биё, мутрибо, уд бинҳода гӯш,
Ба як гӯшмол овараш дар хурӯш.
Хурӯше, ки дилро бар ҳуш оварад,
Ба доно паёму сурӯш оварад.
Дар ин куҳнабеша дурангӣ макун,
Зи шерӣ занӣ дам, палангӣ макун.
Макун зоеъ инъоми худ, зинҳор,
Ба ҳақношиносони ҳақногузор.
Наояд зи як даст кардан ду кор,
Нашояд ба як дил гирифтан ду ёр.

Шеъри Абдураҳмони Ҷомӣ

Соқиномаи Савти Ушшоқ

Мақоми Рост, ҷузъи Наср (овозӣ), шуъбаи 2, Савти Ушшоқ

Биё, соқӣ, оби чу озар биёр!
На май, балки кибрити аҳмар биёр!
Ки бар миси мо кимиёӣ кунад,
Ба нақди хирад раҳнамоӣ кунад.
Биё, мутрибо, захма бар чанг зан!
В- аз он парда ин дилкаш оҳанг зан!
Ки хуш вақти он бесару по гадой,
Ки зад афсари шоҳро пушти пой…
Биё, соқӣ, он ҷоми гетифурӯз,
Ки шабро ниҳад роз бар рӯйи рӯз,
Бидеҳ, то зи макроварони ҷаҳон,
Намонад зи мо ҳеҷ макре ниҳон.

Шеъри Абдураҳмони Ҷомӣ

Соқиномаи Савти Чоргоҳ

Мақоми Дугоҳ, ҷузъи Наср (овозӣ), шуъбаи 2, Савти Чоргоҳ

Биё, соқӣ, он бодаи чун гулоб,
Барафшон ба ман, то дароям зи хоб.
Гулобе зи оби ҷигарҳо бад-ӯст,
Давои ҳама дарди сарҳо бад-ӯст.
Муғаннӣ, биёр он дами ҷонфазой,
Калиде, ки шуд ганҷигавҳаркушой.
Бар ин дар магар чун калид оварӣ,
Аз-ӯ ганҷу гавҳар падид оварӣ.
Биё, соқӣ, он бода бар даст гир!
Ки аз хӯрданаш нест касро гузир.
На бода ҷигаргӯшаи офтоб,
Ки ҳам оташ омад ба гавҳар ҳам об.

Шеъри Низомӣ