Чанд суруду таронаи «Шашмақом»-3

Насри Муҳайяр

Мақоми Ироқ, ҷузъи Наср (овозӣ), шуъба

Маро ақиқи ту бояд, шакар чӣ суд кунад?!
Маро ҷамоли ту бояд, қамар чӣ суд кунад?!
Маро ақиқи ту бояд, шакар чӣ суд кунад?!
Маро ҷамоли ту бояд, қамар чӣ суд кунад?!
Маро закоти ту бояд, хазинаро чӣ кунам?!
Маро миёни ту бояд, камар чӣ суд кунад?!
Шабам чу рӯзи қиёмат дароз гашт, вале, 2б
Дилам суҷуди ту хоҳад, саҳар чӣ суд кунад?!
Чу руҳи ман ту набошӣ, зи руҳ ҳосил чист?
Басиратам чу набахшӣ, басар чӣ суд кунад?!
Ҷаҳон мисоли дарахте, баргу мева зи туст,
Чу баргу мева набошад, шаҷар чӣ суд кунад?!
Зи Шамси мафхари Табрез, он ки нур наёфт, 2б
Вуҷуди тираи ӯро дигар чӣ суд кунад?!

МАТНИ ШЕЪР:
Маро ақиқи ту бояд, шакар чӣ суд кунад?!
Маро ҷамоли ту бояд, қамар чӣ суд кунад?!
Чу маст чашми ту набувад, шаробро чӣ тараб?!
Чу ҳамраҳам ту набошӣ, сафар чӣ суд кунад?!
Маро закоти ту бояд, хазинаро чӣ кунам?!
Маро миёни ту бояд, камар чӣ суд кунад?!
Чу Юсуфам ту набошӣ, маро ба Миср чӣ кор?!
Чу рафт сояи султон, ҳашар чӣ суд кунад?!
Чу офтоби ту набвад, зи офтоб чӣ нур?!
Чу манзарам ту набошӣ, назар чӣ суд кунад?!
Лиқои ту чу набошад, бақои умр чӣ суд?!
Паноҳи ту чу набошад, сипар чӣ суд кунад?!
Шабам чу рӯзи қиёмат дароз гашт, вале,
Дилам саҳури ту хоҳад, саҳар чӣ суд кунад?!
Шабе, ки моҳ набошад, ситорагон чӣ зананд,
Чу мурғро набувад сар, ду пар чӣ суд кунад?!
Чу зӯру заҳра набошад, силоҳу асп чӣ суд?!
Чу дил дилӣ нанамояд, ҷигар чӣ суд кунад?!
Чу руҳи ман ту набошӣ, зи руҳи реҳ чӣ суд?!
Басиратам чу набахшӣ, басар чӣ суд кунад?!
Маро ба ҷуз назари ту набуду нест ҳунар,
Иноятат чу набошад, ҳунар чӣ суд кунад?!
Ҷаҳон мисоли дарахт аст, баргу мева зи туст,
Чу баргу мева набошад, шаҷар чӣ суд кунад?!
Гузар кун аз башарият, фаришта бош, дило,
Фариштагӣ чу набошад, башар чӣ суд кунад?!
Хабар чу маҳрами ӯ нест, бехабар шаву маст,
Чу махбараш ту набошӣ, хабар чӣ суд кунад?!
Зи Шамси мафхари Табрез, он ки нур наёфт,
Вуҷуди тираи ӯро дигар чӣ суд кунад?!

Ғазали Ҷалолиддини Балхӣ

MP3 — фаро кашед ё бишнавед:

1. Академияи Мақом. Насри Муҳайяр.mp3

Насри Сегоҳ

Мақоми Сегоҳ, ҷузъи Наср (овозӣ), шуъбаи 1

Равоқи манзари чашми ман ошёнаи туст,
Карам намову фуруд о, ки хона — хонаи туст.
Равоқи манзари чашми ман ошёнаи туст,
Карам намову фуруд о, ки хона — хонаи туст.
Ба лутфи холу хат аз орифон рабудӣ дил,
Латифаҳое аҷаб зери дому донаи туст.
Дилат ба васли гул, эй булбули чаман, хуш бод,
Ки дар чаман ҳама гулбонги ошиқонаи туст.
Илоҷи заъфи дили мо ба лаб ҳаволат кун,
Ки он муфарреҳи ёқут дар хазонаи туст.
Ба тан муқассирам аз давлати мулозиматат,
Вале хулосаи ҷон хоки остонаи туст.
Ман он наям, ки диҳам нақди дил ба ҳар шӯхе,
Дари хазона ба муҳри туву нишонаи туст.
Ту худ чӣ луъбатӣ, эй шаҳсавори ширинкор,
Ки тавсане чу фалак роми тозиёнаи туст.
Суруди маҷлисат акнун фалак ба рақс орад,
Ки шеъри Ҳофизи ширинсухан таронаи туст.

МАТНИ ШЕЪР:
Равоқи манзари чашми ман ошёнаи туст,
Карам намову фуруд о, ки хона — хонаи туст.
Ба лутфи холу хат аз орифон рабудӣ дил,
Латифаҳои аҷаб зери дому донаи туст.
Дилат ба васли гул, эй булбули саҳар, хуш бод,
Ки дар чаман ҳама гулбонги ошиқонаи туст.
Илоҷи заъфи дили мо ба лаб ҳаволат кун,
Ки ин муфарреҳи ёқут дар хазонаи туст.
Ба тан муқассирам аз давлати мулозиматат,
Вале хулосаи ҷон хоки остонаи туст.
Ман он наям, ки диҳам нақди дил ба ҳар шӯхе,
Дари хазона ба муҳри туву нишонаи туст.
Ту худ чӣ луъбатӣ, эй шаҳсавори ширинкор,
Ки тавсане чу фалак роми тозиёнаи туст.
Чӣ ҷойи ман, ки билағзад сипеҳри шуъбадабоз,
Аз ин ҳиял, ки дар анбонаи баҳонаи туст.
Суруди маҷлисат акнун фалак ба рақс орад,
Ки шеъри Ҳофизи ширинсухан таронаи туст.

Ғазали Ҳофиз

MP3 — фаро кашед ё бишнавед:

1. Тулқин Тоҷибоев. Насри Сегоҳ.mp3

Насри Уззол

Мақоми Бузрук, ҷузъи Наср (овозӣ), шуъбаи 1

Сабо, зи манзили ҷонон гузар дареғ мадор,
В-аз ӯ ба ошиқи мискин хабар дареғ мадор.
Ба шукри он ки шукуфтӣ ба коми бахт, эй гул,
Насими васл зи мурғи саҳар дареғ мадор.
Ҳарифи базми ту будам, чу моҳи нав будӣ,
Кунун ки моҳи тамомӣ, назар дареғ мадор.
Макорими ту ба офоқ мебарад шоир,
Аз ӯ вазифаву зоди сафар дареғ мадор.
Чу зикри хайр талаб мекунӣ, сухан ин аст,
Ки дар баҳои сухан симу зар дареғ мадор.
Ғубори ғам биравад, ҳол беҳ шавад, Ҳофиз,
Ту оби дида аз ин раҳгузар дареғ мадор.

МАТНИ ШЕЪР:
Сабо, зи манзили ҷонон гузар дареғ мадор,
В-аз ӯ ба ошиқи бедил хабар дареғ мадор.
Ба шукри он ки шукуфтӣ ба коми бахт, эй гул,
Насими васл зи мурғи саҳар дареғ мадор.
Ҳарифи ишқи ту будам, чу моҳи нав будӣ,
Кунун ки моҳи тамомӣ, назар дареғ мадор.
Ҷаҳону ҳар чӣ дар ӯ ҳаст, саҳлу мухтасар аст,
Зи ақли маърифат ин мухтасар дареғ мадор.
Кунун, ки чашмаи қанд аст лаъли нӯшинат,
Сухан бигӯву зи тӯтӣ шакар дареғ мадор.
Макорими ту ба офоқ мебарад шоир,
Аз ӯ вазифаву зоди сафар дареғ мадор. (ФЗТ-1-221)
Чу зикри хайр талаб мекунӣ, сухан ин аст,
Ки дар баҳои сухан симу зар дареғ мадор.
Ғубори ғам биравад, ҳол хуш шавад, Ҳофиз,
Ту оби дида аз як раҳгузар дареғ мадор.

Ғазали Ҳофиз

MP3 — фаро кашед ё бишнавед:

1. Академияи Мақом. Насри Уззол.mp3

Насри Ушшоқ

Мақоми Рост, ҷузъи Наср (овозӣ), шуъбаи 1

Агар он турки шерозӣ ба даст орад дили моро,
Ба холи ҳиндуяш бахшам Самарқанду Бухороро.
2б

Бидеҳ, соқӣ, майи боқӣ, ки дар ҷаннат нахоҳӣ ёфт,
Канори оби Рукнободу гулгашти Мусаллоро.
Фиғон, к-ин лӯлиёни шӯхи ширинкори шаҳрошӯб,
Чунон бурданд сабр аз дил, ки туркон хони яғморо.
Зи ишқи нотамоми мо ҷамоли ёр мустағнист,
Ба обу рангу холу хат чӣ ҳоҷат рӯйи зеборо?
Ман аз он ҳусни рӯзафзун, ки Юсуф дошт, донистам,
Ки ишқ аз пардаи исмат бурун орад Зулайхоро.
Насиҳат гӯш кун, ҷоно, ки аз ҷон дӯсттар доранд,
Ҷавонони саодатманд панди пири доноро.

Ғазал гуфтиву дур суфтӣ, биёву хуш бихон Ҳофиз,
Ки бар назми ту афшонад фалак иқди Сурайёро.
2б

МАТНИ ШЕЪР:
Агар он турки шерозӣ ба даст орад дили моро,
Ба холи ҳиндуяш бахшам Самарқанду Бухороро.
Бидеҳ, соқӣ, майи боқӣ, ки дар ҷаннат нахоҳӣ ёфт,
Канори оби Рукнободу гулгашти Мусаллоро.
Фиғон, к-ин лӯлиёни шӯхи ширинкори шаҳрошӯб,
Чунон бурданд сабр аз дил, ки туркон хони яғморо.
Зи ишқи нотамоми мо ҷамоли ёр мустағнист,
Ба обу рангу холу хат чӣ ҳоҷат рӯйи зеборо?
Ман аз он ҳусни рӯзафзун, ки Юсуф дошт, донистам,
Ки ишқ аз пардаи исмат бурун орад Зулайхоро.
Агар дашном фармойӣ, в-агар нафрин, дуо гӯям,
Ҷавоби талх мезебад лаби лаъли шакархоро.
Насиҳат гӯш кун, ҷоно, ки аз ҷон дӯсттар доранд,
Ҷавонони саодатманд панди пири доноро.
Ҳадис аз мутрибу май гӯву рози даҳр камтар ҷӯ,
Ки кас накшуду накшояд ба ҳикмат ин муамморо.
Ғазал гуфтию дур суфтӣ, биёву хуш бихон Ҳофиз,
Ки бар назми ту афшонад фалак иқди Сурайёро.

Ғазали Ҳофиз

MP3 — фаро кашед ё бишнавед:

1. Олим Бобоев. Насри Ушшоқ.mp3

2. Малоҳат Абдушукурова. Насри Ушшоқ.mp3

Насри Чоргоҳ

Мақоми Дугоҳ, ҷузъи Наср (овозӣ), шуъбаи 1

Ду дил ба меҳри ту бастам, ки об шуд ҳар ду,
Ду доғ сӯхтаму офтоб шуд ҳар ду.
Ҳилоли ид ду мисраъ дар обу оина дошт,
Ба як ишорати абру хароб шуд ҳар ду.
Ду шиша хуни ҷигар аз ту доштам дар дил, 2б
Ба як ситезаи чашмон хароб шуд ҳар ду. 2б
Ду лаб ба ғамза кушудӣ, дуо иҷобат шуд,
Ду арза доштаму якҷо ҷавоб шуд ҳар ду.
Ба абрувони ту гуфтам ду байт, як имо,
Ба умр аз ту надидам, китоб шуд ҳар ду.
Ҳамон ду зулф, ки машшота тоб медодӣ,
Ба гардани дилу ҷонам таноб шуд ҳар ду.
Зи дину дил ба ду дунё ду хона дошт, Наҷиб, 2б
Ба як карашмаи соқӣ хароб шуд ҳар ду. 2б

МАТНИ ШЕЪР:
Ду дил зи ишқи ту гаштам, хароб шуд ҳар ду,
Ду доғ сӯхтаму офтоб шуд ҳар ду.
Ду лаб ба аҷз кушудам, дуо иҷобат шуд,
Ду арза додаму якҷо ҷавоб шуд ҳар ду.
Ду шиша хуни ҷигар доштам ниҳон дар чашм,
Ба як карашмаи чашмонаш об шуд ҳар ду.
Қарору сабр, ки умре қарор дошт ба дил,
Ба як салосили пурпечутоб шуд ҳар ду.
Зи дину дил ба ду олам ду хона дошт Наҷиб,
Ба як карашмаи ғафлат хароб шуд ҳар ду.

Ғазали Наҷиб

Насри Чоргоҳ (2)

Мақоми Дугоҳ, ҷузъи Наср (овозӣ), шуъбаи 1

Ду дида сӯйи ту кардам, пуроб шуд ҳар ду,
Зи ҳайрат оинаи офтоб шуд ҳар ду.
Ду нукта сирри даҳону миёнат овардам,
Саволи рамзи адамро ҷавоб шуд ҳар ду.
Ду ҳалқае, ки зи зулфат сабо парешон кард,
Гулӯи ҷону диламро таноб шуд ҳар ду.
Ду наргисат, ки ду соҳир, ду фитнаангез аст,
Барои қатли ман андар итоб шуд ҳар ду.
Ду оразат, ки занад таъна бар маҳу хуршед,
Сипеҳри меҳри туро офтоб шуд ҳар ду.
Ба теғи ханҷари нозат ду пора гашт ҷигар,
Зи тоби оташи ҳуснат кабоб шуд ҳар ду.
Ду нукта сӯзи диламро қалам ба сафҳа навишт,
Ба назди аҳли муҳаббат китоб шуд ҳар ду.
Ду нуктае, ки зи холи лабат баён кардам,
Китоби ҳусни туро фасли боб шуд ҳар ду.
Туробӣ шарҳи ҷамолат ду сатр кард рақам,
Ба Фоиқу ба Наҷибат ҷавоб шуд ҳар ду.

Ғазали Туробӣ

Насруллоӣ

Мақоми Бузрук, ҷузъи Наср (овозӣ), шуъбаи 1

Биё, ки маҷлиси хубони бовафо ин ҷост,
Суруди мутриби риндони хушнаво ин ҷост.
2б

Ҷамоли шоҳиди маънӣ зи шиша, карда тулуъ,
Шаробу соғару соқии маҳлиқо ин ҷост.
Ба гӯшу ҳуш шунидам, ки пири майкада гуфт:
Биё ба сидқ, ки ҷоми ҷаҳоннамо ин ҷост.
Дафу пиёлаву чангу рубобу шишаи май,
Қароргоҳи дили беқарори мо ин ҷост.
Нифоқу ширк дар ин сарзамин намебошад,
Чӣ феълҳову амалҳои бериё ин ҷост.
Ба як карашма дилу дину ақлу ҳушам бурд,
Ғазалсарои ҳарифони хушнаво ин ҷост.
Зи холи кунҷи лаби лаъли ёр пурсидам,
Ба ханда гуфт, ки сарчашмаи бақо ин ҷост.

Касе, ки дар талаби дӯст дарбадар бошад,
Хабар кунед, рафиқон, ки муддао ин ҷост.
2б

ТАРЗИ ДИГАР:
Биё, ки маҷлиси хубони бовафо ин ҷост,
Суруди мутриби риндони хушнаво ин ҷост.
2б

Дафу пиёлаву чангу рубобу шишаи май,
Қароргоҳи дили беқарори мо ин ҷост.
Ба як карашма дилу дину ақлу ҳушам бурд,
Ғазалсарои ҳарифони хушнаво ин ҷост.
Ба гӯшу ҳуш шунидам, ки пири майкада гуфт:
Биё ба сидқ, ки ҷоми ҷаҳоннамо ин ҷост.
Зи холи кунҷи лаби лаъли ёр пурсидам,
Ба ханда гуфт, ки сарчашмаи бақо ин ҷост.

Касе, ки дар талаби дӯст дарбадар бошад,
Хабар кунед, рафиқон, ки муддао ин ҷост.
2б

МАТНИ ШЕЪР:
Биё, ба кулбаам, ай моҳрӯ, сафо ин ҷост,
Нишин ба дидаам, ай нури чашм, ҷо ин ҷост!
Зиёрати дили мо созу сайри ҷаннат кун,
Калиди қуфли дари боғи дилкушо ин ҷост!
Зи доғи туст маро сина равзаи шуҳадо,
Ба ханҷари ту қасам, дашти Карбало ин ҷост!
Маро забони нигоҳи ту ёри ҳарф шуда,
Куҷо равам, ки суханҳои ошно ин ҷост.
Ба кӯят омадаму гашт чашми ман равшан,
Қасам ба хоки қудумат, ки тутиё ин ҷост!
Бинои Каъба бувад дил ба даст овардан,
Агар худоталабӣ мекунӣ, Худо ин ҷост.
Ба гиря гуфтамаш: ‒ Оби Ҳаёт меҷӯям!
Ба ханда гуфт лабаш: ‒ Чашмаи Бақо ин ҷост!
Рақиб хост, ки имшаб ба базм биншинад,
Ишора кард ба абру, ки Сайидо ин ҷост.

Ғазали Ҳофиз

MP3 — фаро кашед ё бишнавед:

1. Маъруфхӯҷа Баҳодуров. Насруллоӣ.mp3

2. Озода Ашурова. Насруллоӣ.mp3

3. Мирсалим Ашуров. Насруллоӣ.mp3

Нимчӯпонӣ

Мақоми Сегоҳ, ҷузъи Наср (овозӣ), шуъбаи 2, Муғулчаи Сегоҳ

Ҳар куҷо лаъли ту ранги хандаи мастона рехт,
Аз хиҷолат оби гавҳар чун май аз паймона рехт.
Дарди маъшуқон ба ошиқ бештар дорад асар,
Шамъ, то ашке бияфшонад, пари парвона рехт. 2б
Ҳасрати васли ту бурд осоиш аз бунёди дил,
Партави шамъ аз шабехуне бар ин вайрона рехт. 2б
Гарди ноз аз домани гесуи ёр афкандаӣ,
Аз гудози мотамам обе ба рӯйи шона рехт.
Гиряи булбул пайи тасвири гул беҳуда аст,
Баҳри сайди тоирони ранг натвон хона рехт.
Ҳар куҷо Бедил мукофоти амал гум карданист,
Мавҷи хоби махмали гул бештар дурдона рехт. 2б

МАТНИ ШЕЪР:
Ҳар куҷо лаъли ту ранги хандаи мастона рехт,
Аз хиҷолат оби гавҳар чун май аз паймона рехт.
Дар ғубори хотири мо сад ҷаҳон ишрат кам аст,
Обрӯйи ганҷҳо дар хоки ин вайрона рехт.
Чархи ҳосид то ба бедардӣ кунад моро ҳалок,
Ҷоми заҳри беғамӣ дар коми мо ёрона рехт.
Золим аз бедастгоҳӣ нест бе тамҳиди зулм,
Дар ҳақиқат арра шамшер аст, чун дандона рехт.
Шаб ки шуд зоҳид ба файзи гардиши ҷом ошно,
Сабҳа ҷойи ҷуръаи май бар замин риндона рехт.
Дарди маъшуқон ба ошиқ бештар дорад асар,
Шамъ то ашке бияфшонад, пари парвона рехт.
Дӯш савдои кӣ мезад шишаи ашкам ба санг?
К-аз мижа то доманам яксар дили девона рехт.
Илтифоти беғараз сарриштаи тасхири мост,
Сайди мо хоҳӣ, буруни дом, бояд дона рехт.
Уқдаи дилро зи зулфаш боз кардан мушкил аст,
Бедил, ин ҷо нохун аз ангуштҳои шона рехт.

Ғазали Бедил

MP3 — фаро кашед ё бишнавед:

1. Мастона Эргашева. Нимчӯпонӣ.mp3

Орази Дугоҳ

Мақоми Дугоҳ, ҷузъи Наср (овозӣ), шуъбаи 1

Ғизои руҳ бувад бодаи раҳиқ, алҳақ,
Ки рангу бӯ-ш занад рангу бӯйи гулро дақ.
Ғуломи он майи софам, ки аз рухи хубон
Ба як-ду ҷом барорад ҳазор гуна арақ.
Ба таъм талх чу панди падар, валек муфид,
Ба пеши ҷоҳил ботил, ба назди доно ҳақ.
Ҳалол гашта ба фатвои ақл бар доно,
Ҳаром гашта бар аҳкоми шаръ бар аҳмақ.
Чу Буалӣ агар ту май хӯрӣ ҳакимона,
Ба ҳаққи Ҳақ, ки вуҷудат ба Ҳақ шавад мулҳақ.

Ғазали Ибни Сино

Орази Наво

Мақоми Наво, ҷузъи Наср (овозӣ), шуъбаи 1

Ҳумои авҷи саодат ба доми мо афтад,
Агар туро гузаре бар мақоми мо афтад.
Ҳубобвор барандозам аз нишот кулоҳ,
Агар зи рӯйи ту аксе ба ҷоми мо афтад.
Шабе, ки моҳи мурод аз уфуқ шавад толеъ,
Бувад, ки партави нуре ба боми мо афтад.
Ба боргоҳи ту чун бодро набошад бор,
Кай иттифоқи маҷоли саломи мо афтад?
Чу ҷон фидои лабаш шуд, хаёл мебастам,
Ки қатрае зи зулолаш ба коми мо афтад.
Хаёли зулфи ту гуфто, ки «Ҷон васила масоз,
К-аз ин шикор фаровон ба доми мо афтад!»
Ба ноумедӣ аз ин дар марав, бизан фоле,
Бувад, ки қуръаи давлат ба номи мо афтад.
Зи хоки кӯйи ту ҳар гаҳ, ки дам занад Ҳофиз,
Насими гулшани ҷон дар машоми мо афтад.

МАТНИ ШЕЪР:
Ҳумои авҷи саодат ба доми мо афтад,
Агар туро гузаре бар мақоми мо афтад.
Ҳубобвор барандозам аз нишот кулоҳ,
Агар зи рӯйи ту аксе ба ҷоми мо афтад.
Шабе, ки моҳи мурод аз уфуқ шавад толеъ,
Бувад, ки партави нуре ба боми мо афтад.
Ба боргоҳи ту чун бодро набошад бор,
Кай иттифоқи маҷоли саломи мо афтад?
Чу ҷон фидои лабаш шуд, хаёл мебастам,
Ки қатрае зи зулолаш ба коми мо афтад.
Хаёли зулфи ту гуфто: «Ки ҷон васила масоз,
К-аз ин шикор фаровон ба доми мо афтад!»
Ба ноумедӣ аз ин дар марав, бизан фоле,
Бувад, ки қуръаи давлат ба номи мо афтад.
Зи хоки кӯйи ту ҳар гаҳ, ки дам занад Ҳофиз,
Насими гулшани ҷон дар машоми мо афтад.

Ғазали Ҳофиз

MP3 — фаро кашед ё бишнавед:

1. Озода Ашурова. Орази Наво.mp3